“ဓားခြစ်ရာများ”

“ဓားခြစ်ရာများ”

(၁)

သူ့တွင် ဓားတစ်လက်ရှိသည်။ ဆင်စွယ်အရိုးတပ် ဓားမြှောင်တစ်လက် ဖြစ်သည်။ အသွား နှစ်ဖက်ပါသော ခြောက်လက်မ ဓားမြှောင် တစ်လက်ဖြစ်သည်။ဓားအိမ်မှာ သစ်သားအိမ်ကို သားရေအတုစွပ်ထားသည့် ဓားအိမ် မျိုးဖြစ်သည်။ ဒီဓားကို သူ၏ သူငယ်ချင်း တစ်ယောက်ထံမှ လက်ဆောင် အဖြစ် လက်ခံရရှိခဲ့ခြင်း ဖြစ်သည်။ ထို သူငယ်ချင်းသည် တက္ကသိုလ်ကျောင်းတစ်ခုတွင် Queen ဘွဲ့ရရှိထားသည့် မိန်းမချော တစ်ယောက် ဖြစ်နေသည် မှာမူ အနည်းငယ် ကြောင်စီစီနိုင်လိမ့်မည် ဟုထင်ပါသည် ။ငယ်ရွယ်လှပသော မိန်းမပျိုလေး တစ်ယောက် အနေဖြင့် ဓား တစ်လက် နှင့်ပတ်သတ်ရန် အကြောင်းရှိခဲ့ပါသလား ဆိုတာကိုတော့ သူ မသိပါ။

မှတ်မှတ်ရရ ထိုနေ့ သည် တက္ကသိုလ် စာမေးပွဲ နောက်ဆုံးနေ့ဖြစ်သည်။ ရုပ်ရှင်များထဲကလို နှင်းများဝေမနေပါ။ ကျောင်းစောင့် ဦးလေးကြီး အမှိုက်များကို စုပုံမီးရှို့နေရာမှ လွင့်တက်လာသော မီးခိုးစများသည်သာ အနည်းငယ် မှိုင်းဝေလျက်ရှိသည်။ ကျောင်းဖယ်ရီကား အလာကို သူတို့ ထိုင်စောင့်နေကြစဉ်တွင် ဖြစ်သည်။ သူမ သူ့ကို အညိုရောင် ပါဆယ်တစ်ခုပေးခဲ့သည်။ အထဲတွင် ဓားမြှောင်တစ်လက်ရှိနေလိမ့်မည် ဟု ထိုစဉ်က သူ မထင်ခဲ့ မိပါ။ စာအုပ် သို့မဟုတ် တခြား အမှတ်တရ ပစ္စည်းတစ်ခုခုဖြစ်လိမ့်မည်ဟုသာ ထင်ခဲ့သည်။ သူမဆီမှ ပထမဆုံး နှင့် နောက်ဆုံး အနေဖြင့် လက်ခံရရှိခဲ့သော ထိုလက်ဆောင်သည် ဓားတစ်လက် ဖြစ်နေ သည်ကို သိရသောအခါ ခင်မင်ရင်းနီးခဲ့ရသော နေ့စွဲများတွင် သူမ ပြောခဲ့ဖူးသော စကားတစ်ခွန်းသည် ဓားအိမ်ထဲမှ လျှောခနဲ ထွက်ကျလာသည်။

"လူတစ်ယောက်မှာ ဓားတစ်လက်တော့ရှိသင့်တယ်....ရှင့် ။ "

ထိုစကားကို သူ အခုအချိန်အထိ နားမလည်ခဲ့ပါ။ သို့မဟုတ် နားမလည်ချင်ခဲ့ပါ။ သူ့ကို နှုတ်ဆက်၍ ထွက်ခွာ သွားသော သူမ၏ ဆိုင်ကယ်စက်သံလေးက တရွေ့ရွေ့ဝေးသွားခဲ့သည်။ ထိုနေ့က အပြာမွဲမွဲ အရောင် ကျောင်းကား များသည်  ပြာလွင် တောက်ပ နေခဲ့သည် ဟု ထင်၏။

(၂)

ဓားတစ်လက်သည် ဓားအိမ်ထဲတွင် ငြိမ်သက်စွာ ခိုနားနေသမျှ မည်သူ့ကိုမျှ ထိရှစေခြင်းမရှိသည်ကို အားလုံးသိကြသည်။ သို့သော် လူတို့သည် ဓားကို မလိုအပ်ပါဘဲနှင့်  ဓားအိမ်ထဲမှ ဆွဲထုတ်ဖို့ကြိုးစားကြသည်။ ထိုရောအခါ ဓားအိမ်၏ ထိန်းချုပ်မှုမှ ကင်းလွတ်သွားသော ဓားတစ်လက်သည် တစ်စုံတစ်ယောက် သို့မဟုတ် တစ်စုံတစ်ရာကို ထိခိုက်ပြတ်ရှစေနိုင်တော့သည်။ ဓားကိုင်သူ၏ လက်ကိုပင် ပြန်လည်ထိရှစေနိုင်သည်။ဓားကို ထိန်းချုပ်နိုင်သည်မှာ ဓားအိမ်တစ်ခုလား၊ ဓားကိုင်သည့် လက်လား ဆိုသည်မှာမူ အငြင်းပွားစရာကောင်းသော ကိစ္စတစ်ခုပင်ဖြစ်ပါသည်။

ဓားသည် သက်မဲ့ပစ္စည်းတစ်ခုဖြစ်သည်။ သို့သော် အချို့သော တုံပြန့်နိုင်စွမ်းရှိသည့် သက်မဲ့ ပစ္စည်းများ နည်းတူပင် ဓားတစ်လက် သည်လည်း တုံပြန်မှုရှိသည်။အကြိမ်ကြိမ် သွေးထားသော ဓားတစ်လက်၏ အသွား သည် ထက်မြနေမည်။မသွေးဘဲ ပစ်ထား သော ဓားတစ်လက်၏ အသွားတွင် ထက်မြမှုမရှိ။ ဓားသွေး ကျောက် နှင့် ဓားကို အကြိမ်ကြိမ် ပွတ်တိုက်ခြင်းအားဖြင့် ဓား၏ အသွားသည် ပိုမိုထက်ရှလာသည်။ ဓားသွေး ကျောက်မှာမူ တဖြည်းဖြည်းပါးလျားလာရသည်။ အသွား ထက်မြ စေရန်ဟူသော ရည်ရွယ်ချက်ဖြင့် ဓားကို သွေးသော်လည်း ဓားတစ်လက်အနေဖြင့် မိမိ၏ အသွားထက်မြလာစေခြင်းအတွက် ကြိမ်ဖန်များစွာ ဓားသွေး ကျောက်ပေါ်တွင် ပွတ်တိုက်ခြင်းခံနေရသည်နှင့် ပတ်သတ်၍ ကျေနပ်ပျော်ရွှင်နေနိုင်မည် လားဆိုသည်မှာ သူ့စိတ်ကို ခဏခဏ လာထိရှသော မေးခွန်းတစ်ခုပင်ဖြစ်ပါသည်။

(၃)

"ဟေ့ကောင်...ပစောက်နဲ့ ဖဦးထုပ်ဟာ ကပ်နေတာ။

 မပျင်းနဲ့။  'ပျင်း' ရင် 'ဖျင်း' သွားလိမ့်မယ်။ 

 ဓားတစ်လက်ကို ထက်မြက်အောင် အကြိမ်ကြိမ်သွေးနေဖို့လိုတယ်ကွ"

သူ ငယ်စဉ်အခါက အကြိမ်ကြိမ် ကြားခဲ့ရသော သူ့အဖေ၏ ဆုံးမစကားများ ဖြစ်သည်။ သူငယ်ငယ်က နည်းနည်း ပျင်းပါသည်။ ကြီးလာသောအခါ များများပျင်းပါသည်။ အဖေကလည်း သူ့ကို ငယ်စဉ်ကလို ဆုံးမလေ့မရှိတော့ပါ။ ဆုံးမဖို့ မလိုအပ်တော့ဟု ယူဆ လိုက်ပုံရပါသည်။ တကယ်တော့ အသက်ကြီးလာလေလေ အပျင်းကြီး လာလေ ဖြစ်သော သူ့အတွက် ငယ်စဉ်ကထက်ပင် ပို၍ ဆုံးမဖို့ လိုအပ်လိမ့်မည် ထင်ပါသည်။

သူ အဓိပ္ပါယ်မဲ့ ပိုက်ဆံရှာရမှာ ပျင်းသည်။ ငွေကြေးစုဆောင်းရမှာ ပျင်းသည်။ စိတ်မပါဘဲ ယဉ်ကျေးမှုအရ ပြုံးပြရမှာ ပျင်းသည်။ စကားပြောချင်စိတ်မရှိသော်လည်း အခြေနေအရ မဖြစ်မနေ ပြောနေရတာမျိုး ပျင်းသည်။ ဖန်တစ်ရာ တေနေသော မဲပြာပုဆိုး ကဗျာများဖတ်ရမှာပျင်းသည်။စသဖြင့် သူ၏ ‘ပျင်း’ နေသော အနေအထား သည် ‘ဖျင်း’ သွား ရန်ပင်နီးကပ်နေပြီ ထင်ပါသည်။ တစ်နေ့နေ့တော့ သူ မရောက်တာကြာပြီဖြစ်သော အဖေ့ဆီ သွားပါဦးမည်။ အဖေ့ကို သူ့အား ဆုံးမဖို့ သတိပေးမည်။ အဖေ့အတွက် သူ ဘယ်တုန်းက မှ မသွေးဖြစ် ခဲ့သော ဓား တစ်လက်ကို လက်ဆောင်ပေးဖို့ ရှိပါသည်။

ကလေးဘ၀နေ့စွဲများတွင် အဖေက သူ့ကို ဓား တစ်လက်ပေးခဲ့ဖူးသည်။ တစ်ကယ့် ဓား အစစ်မဟုတ်သော သစ်သား ဓား တစ်လက်ဖြစ်ပါသည်။ ကပွဲတစ်ခု၌ ယိမ်းကရာတွင် အသုံးပြုသော သစ်သားကို ဓားပုံသဏ္ဌာန် ခုတ်ထွင်ထားသည့် အရုပ်ဓားဖြစ်သည်။ ကလေးတစ်ယောက်အတွက်တော့ သစ်သားဓား တစ်လက်သည်ပင် ကောင်းကောင်း လုံလောက်ပါသည်။ သူ့၏ ကလေးဘ၀ ကုန်ဆုံးသွားချိန်တွင် ထိုသစ်သားဓား ကို တခြားကလေး တစ်ယောက်အား ပေးပစ်လိုက်မိသည်ထင်သည်။ လူတစ်ယောက်အတွက် ဓားတစ်လက်သည် မဖြစ်မနေပင် လိုအပ်မည်ဆိုပါက သစ်သားဓားတစ်လက်ကိုသာ သူ ကိုင်ဆောင်ချင်ပါသည်။

သူ ငယ်ငယ်က ဘာဖြစ်ချင်ခဲ့သည်ကို ပြန်စဉ်းစားမိသည်။တကယ်တော့ သူ ဘာမှ မဖြစ်ချင်ခဲ့ဖူးပါ။ ထို့ကြောင့် အခုအချိန်ထိလည်း ဘာမှ မယ်မယ်ရရ ဖြစ်မလာပါ။ ငယ်ငယ်က ဆရာဝန်ဖြစ်ချင်သော သူ၏ သူငယ်ချင်း တစ်ယောက် အခု ဆရာဝန်တစ်ယောက် ဖြစ်နေပါသည်။ ကျောင်းဆရာဖြစ်ချင်ခဲ့သော သူငယ်ချင်းက ကျောင်းဆရာ ဖြစ်နေပါသည်။ ချွင်းချက်အနေဖြင့် သင်္ဘောသား ဖြစ်ချင်ခဲ့သော သူငယ်ချင်းမှာ အခု စက်လှေမောင်းနေသည်။ သူသည်လည်း ဖြစ်ချင်ခဲ့သောဘ၀နှင့် အနည်းငယ် နီးစပ်သည် ဟုဆိုရပါမည်။ ဘာမှမဖြစ်ချင်ခဲ့သော သူ သည် ဘာမှဖြစ်မလာပါ။ ဘာမှမဖြစ်ချင်သည့်စိတ်နှင့်ပင် သူ ကဗျာ ရေးပါသည် ။  (သို့မဟုတ်) ကဗျာဟု ယူဆဖွယ်ရှိသော စာသားများ အနည်းငယ် ရေးပါသည် ။ အခြား စာတိုပေစ အနည်းငယ်ရေးပါသည် ။

သူ ပက်လက်ကုလားထိုင်ကိုတော့ ကြိုက်သည်။ ပက်လက်ကုလားထိုင်တွင် ထိုင်ရင်း အပျင်းဆန့်ရသည်ကို အထူး နှစ်သက် သည်။ ရံဖန်ရံခါ ထိုသို့အပျင်းဆန့်နေရင်း အဖေပြောသော "ဓားတစ်လက်ကို ထက်မြက်အောင် ကြိမ်ကြိမ် သွေးနေဖို့ လိုတယ်" ဆိုသည့်စကားကို အဖန်ဖန်တလဲလဲ စဉ်းစားနေမိသည်။ ထက်မြက်လာတဲ့ ဓားတစ်လက်ရဲ့ နောက်ဆက်တွဲ ဖြစ်ရပ်တွေဟာ ဘာတွေဖြစ်လာမလဲ တွေးမိသည်။ သစ်ခုတ်သမားတစ်ယောက် ၏ လက်ထဲမှ ဓားသည် သစ်ပင်ကို ထိခိုက်စေမည်။ သားသတ် သမားတစ်ယောက်၏ လက်ထဲမှ ဓားသည် သားကောင်တို့ကို ဇီဝိန်ခြွေမည်။ သူရဲကောင်းတစ်ယောက်၏ လက်ထဲမှ ဓားသည်လည်း သတ်ဖြတ်ဖို့ပင် ဖြစ်သည် မဟုတ်လား။

ထိုကဲ့သို သူ တွေးနေမိသည်ကို သူ့အဖေသာသိလျှင် သူ့အား အဆိုးမြင်ဝါဒီဟု သတ်မှတ် လိမ့်မည်ထင်သည်။ သို့သော် ရူးသွပ်နေသော သူတစ်ယောက်၏ လက်ထဲမှ ဓားတစ်လက်၏ ထက်မြက်မှု ကို ဘယ်အကောင်းမြင် ၀ါဒီသမားမှ မကြောက်ရွံ့ဘဲ နေမည်မဟုတ်ပါ။ ဓားတစ်လက်ရဲ့ အကျိုးသက်ရောက်မှုသည် ဓားကိုကိုင်တွယ် သော လက်ပေါ်တွင် မူတည်သည်ဆိုသည်မှာ အငြင်းပွားဖွယ်မရှိ။ လောကတွင်  ရူးသွပ်နေသာ လူများဖြင့် ပြည့်နှက် နေသည်မှာလည်း အလားတူပင်  အငြင်းပွားဖွယ်မရှိ။ သူသည်လည်း ရူးသွပ်နေသော သူတစ်ယောက်  ဖြစ်နိုင်ပါသည်။

(၄)

ပြီးခဲ့တဲ့ရက်က တက္ကသိုလ် ကျောင်းနေဘက် သူငယ်ချင်းတစ်ယောက်နှင့် ပြန်တွေ့ဖြစ်သည်။ ကျောင်းပြီး ကတည်းက ကွဲကွာသွားခဲ့ကြပြီး အခုမှ ပြန်တွေ့ကြရခြင်းဖြစ်သည်။ ငွေကြေး မပြည့်စုံသော ဘ၀ဖြင့် ကျောင်းတက်ခဲ့ရသည့် ထိုသူငယ်ချင်းကို ယခု တောက်တောက် ပြောင်ပြောင် အဆင်ပြေနေသည့် အခြေအနေဖြင့် ပြန်တွေ့ရ၍ ၀မ်းသာမိသည်။ နိုင်ငံခြားမှ ပြန်ရောက်သည်မှာ မကြာသေးဟု သိရသည်။

"မင်း..သူဌေးဖြစ်နေပြီပေါ့"

 ဟု သူ မေးလိုက်သည်ကို သူငယ်ချင်းက ပြန်မဖြေဘဲ ပြုံးရုံသာပြုံးပြနေသည်။ ပြုံးနေသောမျက်နှာတွင် တစ်ချိန်ကထင်ဟပ်ခဲ့သော အားငယ်မှု အရိပ်ယောင်များကို တွေ့မြင်နေရသေးသည်။ ငွေကြေးသည် တစ်ချိန်က စွန်းထင်းခဲ့ဖူးသော ထို အားငယ်စိတ်များကို ဆေးကြော ပစ်နိုင်စွမ်း မရှိသည်လား မသိပါ။

လွန်ခဲ့သော နှစ်အနည်းငယ်က စာသင်ခန်းရှေ့ ၀ရန်တာတွင် သူနှင့် သူ၏ သူငယ်ချင်း နှစ်ယောက်သား အတူထိုင်နေရင်း ရောက်တတ်ရာရာ စကားများပြောဆိုနေကြသည်။ 'ရွှေနှင်းဆီ' ဆေးပေါ့လိပ်အတိုလေးကို တရှိုက်မက်မက် ဖွာရိုက်လိုက်ရင်း သူ၏ သူငယ်ချင်းက-

"သူဌေး ဆိုတာ ပိုက်ဆံကလွဲပြီးဘာမှမရှိတဲ့သူတွေပဲကွ"

ဟု အဝေးမှာမြင်နေရသော အနီရောင်တောင်ကုန်းလေးကိုငေးကြည့်နေလျက် ပြောလိုက်သည်။ ထိုစကားသည် သူ့အဖို့ ခဏ ခဏ ကြားနေရသဖြင့် ရိုးအီနေပြီဖြစ်သော်လည်း စကားပြောရမှာထက် နားထောင်ရမှာကို ပိုနှစ်သက်သော သူ၏ အကျင့်အတိုင်း ဘာမှပြန်မပြောဖြစ်ဘဲ ဆက်၍သာ နားထောင်နေဖြစ်လိုက်သည်။

"ပိုက်ဆံလိုချင်စိတ်ကြောင့် ပိုက်ဆံကိုရှာတယ်

ပိုက်ဆံတစ်ခုတည်းကိုပဲ အာရုံစိုက်ပြီးရှာနေတာကြောင့်

ပိုက်ဆံတစ်ခုပဲရပြီး တခြားအရာတွေ အားလုံး ဆုံးရှုံးသွားရတယ်"

ထိုစကားကို ပြောပြီး လက်ကြားမှ မီးသေနေသော ဆေးလိပ်တိုကို မီးပြန်ညှိနေသောသူငယ်ချင်းကို သူ မေးခွန်းတစ်ခုတော့ မေးဖြစ်ခဲ့လိုက်သည်.။

"ဆုံးရှုံးသွားရတဲ့ တခြားအရာတွေ ဆိုတာ ဘာတွေလဲ"

သူငယ်ချင်းက ဆေးလိပ်မီးခိုးများကို မှုတ်ထုတ်လိုက်ရင်း သူ့ကို စိုက်ကြည့်နေခဲ့သည်။ သို့သော် သူ၏မေးခွန်း ကိုတော့ အဖြေမပေးခဲ့ပါ။ အခု သူငယ်ချင်း၏ မျက်နှာကို သူ စိုက်ကြည့်နေ မိသည်။ သို့သော် သူ ၏ တစ်ချိန်က မေးခွန်းကိုတော့ ထပ်မမေးဖြစ်တော့ပါ။ထို့နောက် သူငယ်ချင်းသည် မင်္ဂလာပွဲ ဖိတ်စာ တစ်စောင်ထုတ်ပေးကာ ရှေ့လာမည့် တနင်္ဂနွေတွင် ပြုလုပ်မည့်သူ၏မင်္ဂလာပွဲသို့ ဆက်ဆက် လာခဲ့ရန် မှာကြားပြီး ခပ်သုတ်သုတ် ထွက်ခွာ သွားလေသည်။

မင်္ဂလာ ဖိတ်စာပေါ်မှ သူတို့သမီး နာမည်ကို ကြည့်မိလိုက်သည့်အခါ သူ အနည်းငယ်တော့ အံအား သင့်သွားသည်။ ၀တ္ထု ဇာတ်လမ်းရေးဆရာများ တမင်တကာ လုပ်ယူလေ့ရှိသော တိုက်ဆိုင်မှုသည် သူ့ ဘ၀ ထဲသို့ တိုက်ဆိုင်စွာပင် ကျရောက်လာသည်ထင့်။

သူမ..။

ဓားတစ်လက်...။

တက္ကသိုလ် နေ့ရက်များ...။

သူအံ့အားသင့်စွာပင် သောက်နေကျ ဘုံဆိုင်အိုလေး ရှိရာဆီသို့ တရွေ့ရွေ့ ထွက်လာခဲ့မိသည်။

(၅)

လာမည့် တနင်္ဂနွေတွင် မင်္ဂလာပွဲတစ်ခုရှိသည်။

လာမည့် တနင်္ဂနွေတွင် သူ၏ သူငယ်ချင်းနှင့် သူ၏ သူငယ်ချင်းမလေး တို့ ၏ မင်္ဂလာပွဲတစ်ခုရှိသည်။

လာမည့် တနင်္ဂင်္နွေတွင် သူ ထို မင်္ဂလာပွဲသို့သွားရမည်။

သူ့တွင် တန်ဖိုးသင့်တင့်သော မင်္ဂလာ လက်ဆောင်ပစ္စည်း တစ်ခုဝယ်ရန်ပင် လုံလောက်သောငွေကြေးမရှိ။

သူ့တွင် ဘယ်တုန်းကမှ မသွေးခဲ့ဖူးသော ဓားတစ်လက်သာရှိသည်။

ဘယ်လိုပဲဖြစ်ဖြစ် သူ  ထိုမင်္ဂလာပွဲသို့ သွားဖြစ်အောင်သွားလိမ့်မည်။

သူ၏ သူငယ်ချင်း ကို  နှုတ်ဆက်မည်။မင်္ဂလာလက်ဖွဲ့အဖြစ် မေးခွန်းတစ်ခု လက်ဖွဲ့လိုကြောင်းပြောမည်။

သူ၏ သူငယ်ချင်းမလေးကို နှုတ်ဆက်မည်။ သူငယ်ချင်းမလေးက သူ့ကို -

"ရှင် ဟာ ခပ်တုံးတုံးဓားတစ်လက်ပဲ " ဟု စိတ်ထဲမှ ပြောချင်ပြောနေပါလိမ့်မည်။

သို့ဆိုလျှင် ထိုစကားနှင့် ပတ်သတ်၍ သူ့တွင် ပြန်လည်ချေပရန် ပြောစရာ စကားမရှိပါ။

သူ့တွင် ဘယ်တုန်းကမှ မသွေးခဲ့ဖူးသော  ဓားတစ်လက် သာရှိပါသည်။     ။

                                                                                       လင်းဝေအိမ်(၂၆-၀၅-၂၀၁၄)

                                                                        

“ပန်းချီကားထဲက လမ်းကလေး”

“ပန်းချီကားထဲက လမ်းကလေး”

ကျွန်တော့် အိမ်ရဲ့ ဧည့်ခန်း နံရံ ပေါ်မှာ ပန်းချီကားတစ်ချပ် ချိတ်ဆွဲထားပါတယ်။ အဲဒီ ပန်းချီကား ထဲမှာ လမ်းကလေးတစ်လမ်း ရှိတယ်။ အဲဒီ လမ်းကလေးရဲ့ အဆုံးမှာ ဘာတွေ ရှိမလဲ ဆိုတာ ကိုတော့ ကျွန်တော် မသိပါ။ တကယ်တော့ အဲဒီ လမ်းကလေးရဲ့ အစမှာ ဘာတွေ ရှိခဲ့မယ် ဆိုတာကိုတောင် ကျွန်တော် မသိနိုင်ပါ။ ကျွန်တော်တို့ဟာ ဘယ်မှာ အစပြုခဲ့သည် မသိ၊ ဘယ်မှာ အဆုံး သတ်လိမ့်မည် မသိသော လမ်းများတွင် လျှောက်လှမ်း နေကြရသည်တဲ့လား။

လမ်းတိုင်း လမ်းတိုင်းမှာ အဆုံးသတ် ဆိုတာ ရှိကြရသလား။ လမ်းတစ်ခုစီမှာ အဆုံးသတ် ရောက်ရှိရမယ့် နေရာဒေသတစ်ခု မဖြစ်မနေ ရှိကြရသလား။ ကျွန်တော် မသိပါ။ ဒါပေမယ့် ပျောက်ဆုံးသွားတဲ့ ဆွေမျိုးသားချင်း တစ်ယောက်နဲ့ ဆင်တူတဲ့ သူ တစ်ယောက်ကို ပြန်တွေ့ လိုက်ရတဲ့ စိတ်ခံစားမှုမျိုးနဲ့ အဲဒီ ပန်းချီကားထဲက လမ်းကလေးကိုတော့ ကျွန်တော် ချစ်မြတ်နိုး မိပါတယ်။ အဲသလိုနဲ့ ကျွန်တော့် အိမ်ရဲ့ ဧည့်ခန်းမှာ အဲဒီ လမ်းကလေး ပါဝင်တဲ့ ပန်းချီကားလေး ရောက်ရှိ လာခဲ့ပါတယ်။

ကျွန်တော်တို့ တစ်တွေမှာ ဖြစ်ချင်ခဲ့တာလေးတွေ  ကိုယ်စီ ကိုယ်စီ ရှိခဲ့ကြဖူးပါတယ်။ လက်တွေ့ဖြစ်မလာနိုင်ခဲ့တဲ့ ငယ်အိပ်မက် ကလေးတွေကို အသီသီး ပိုင်ဆိုင်ဖူးခဲ့ကြပါလိမ့်မယ်။ စိတ်ဆန္ဒ ရှိသော်လည်းပဲ အခြေနေ အကြောင်းကြောင်းကြောင့် မလျှောက်ဖြစ်နိုင်ခဲ့တဲ့ လမ်းကလေးတွေပေါ့။ တစ်ခါ တစ်လေမှာ ကုန်လွန်ခဲ့ပြီးသော ၀ါကျင်ကျင် စာမျက်နှာ အဟောင်း လေးတွေကို ပြန်ဖတ်မိတဲ့အခါ အဲဒီ လမ်းကလေးတွေကို  ပြန်လွမ်းရတတ်ပါတယ်။ မရှင်သန်နိုင် ခဲ့တဲ့ အိပ်မက်အသေ ကလေးတွေ ဖြစ်လင့်ကစား ငယ်ဘ၀ အိပ်မက်တွေဟာ အတိုင်းတာ တစ်ခုအထိ ဖြူစင်ခဲ့ ကြတာတော့ အမှန် ပါပဲလေ။

ဘ၀ဟာ ဘာလဲ။ အဲဒီ မေးခွန်းကို လူပေါင်းများစွာက အဖြေပေါင်းများစွာဖြင့် ဖြေဆိုခဲ့ကြ  ပြီးပါပြီ။ ဘ၀ဆိုတာ ဟု အစ ချီသော အဓိပ္ပါယ် ဖွင့်ဆိုချက်များ မြောက်များစွာ ရှိခဲ့ပါပြီ။ ကျွန်တော့် အတွက်တော့ ဘ၀ဟာ အဓိပ္ပါယ်ဖွင့်ဆိုဖို့ မလိုအပ်တဲ့ ကဗျာ တစ်ပုဒ်ပါပဲ။ ဒါပေမယ့် အဲဒါ သည်ပင်လျှင် အဓိပ္ပါယ် ဖွင့်ဆိုချက် တစ်ခု ဖြစ်သွားသည် ကိုတော့ ကျွန်တော် မငြင်းလိုတော့ပါ။ ကျွန်တော် တို့ဟာ ကိုယ့် အတ္တထဲမှာပဲ ကိုယ် ကူးခတ် ပျော်မွေ့နေကြတဲ့ ငါးတွေ ဖြစ်ကြပါတယ်။

ခရီး ရှည်ကြီးကို လျှောက်လှမ်းနေရင်း ကျွန်တော့် အိပ်ထဲမှ အိပ်မက်အချိူ့ ခဏခဏ ကျကျ ပျောက်ခဲ့ရပါတယ်။ ရည်ရွယ်ချက် ကြီးမားစွာ စိုက်ပျိုးခဲ့တဲ့ ပန်းခင်းလေး မရှင်သန် နိုင်တော့တဲ့အခါ စိုက်ပျိုး ခွင့်ရတဲ့ ပန်းပင်လေး တွေကိုပဲ ပန်းတွေ ဝေနေအောင် တာဝန်ကျေကျေ ဆက်လက် ပြုစု ရပါလိမ့်မယ်။

ဘ၀ဟာ တိုတောင်း လွန်းတယ်။ လမ်းတွေကတော့ ရှည်လျား ကောက်ကွေ့ လွန်းတယ်။ မာယာများတဲ့ လမ်းတွေမှာ ကံတရားနဲ့ အပြေး ပြိုင်ရင်း လဲကျခဲ့ရတဲ့ အကြိမ်ရေလည်း မနည်းတော့။ နင်းလို သူတွေက နင်းသွားကြတယ်။ ကျော်လို သူတွေက ကျော်ခွ သွားကြတယ်။ တိုးတိုက် လိုသူတွေက တိုးတိုက် သွားကြပြန်ပါတယ်။ ဘယ်နေရာကို ရောက်မယ်မှန်း သိသည်ဖြစ်စေ မသိသည်ဖြစ်စေ ကျွန်တော်တို့ဟာ  ဆက်သွား နေကြရဦးမှာပါပဲ။

ဝါကျ တစ်ကြောင်းကို စိတ်လိုလက်ရ ချရေးလိုက် ပြီးခါမှ အဲဒီ ၀ါကျရဲ့ အဓိပ္ပါယ်ကို ပြန်လည် ရှာဖွေဖို့ ကြိုးစားနေရတဲ့ နေ့စွဲတွေလည်း များခဲ့ပါပြီ။ ကိုယ်တိုင် ကိုယ်ကျ ကိုယ့်လက်နဲ့ ရေးခြစ်လိုက် ပြီးခါမှ ကိုယ့်လက်ရေး ဖြစ်မလာတဲ့ အက္ခရာတွေဟာ ကျွန်တော်ရဲ့ လွယ်အိတ်လေး ထဲမှာ ထိုးထိုး ထောင်ထောင်နဲ့ ကျွန်တော့်ကို လှောင်ပြောင် ရယ်မောနေကြပါတယ်။ ဘာပဲဖြစ်ဖြစ် ကျွန်တော် သူတို့ကို ချစ်ပါတယ်။

ပြောခဲ့ ပြီးသည့် အတိုင်း ကျွန်တော့် အိမ်ရဲ့ ဧည့်ခန်းမှာ ပန်းချီကားလေး တစ်ချပ် ချိတ်ဆွဲ ထားတယ်။ ပန်းချီ ကားလေး ထဲမှာ လမ်းကလေး တစ်လမ်း ရှိတယ်။ ဒါဟာ ရောဘတ်ဖရော့စ် ရဲ့ ‘မရွေးချယ်ဖြစ်ခဲ့တဲ့လမ်း’ ^* တော့ မဟုတ်ပါဘူး.။ ရွေးချယ်ခွင့်လေးတောင် မရခဲ့တဲ့ လမ်းကလေး ပေါ့။ အဲဒီ လမ်းကလေး အတိုင်း လျှောက်သွားရင် ဘယ်နေရာကို ရောက်လိမ့်မလဲ ဆိုတာကို ကျွန်တော် စိတ်ကူးနဲ့ အကြိမ်ကြိမ် မှန်းဆ ကြည့်မိပါတယ်။ ဒါပေမယ့် ကျွန်တော့်ရဲ့ စိတ်ကူးထဲက ရပ်ဝန်းတစ်ခုကို အသေချာ ရောက်နိုင်ပါ့မလား ဆိုတာကိုတော့  ဘယ်သူမှ သိနိုင်စွမ်း မရှိတော့ပါ။ အတိတ်မှာ ကျန်ရစ်ခဲ့ပြီးသော လမ်းကလေးကို လျှောက်လှမ်းဖို့ မဖြစ်နိုင်တော့ ပြီပဲလေ။

ကျွန်တော်ဟာ အချိန်ရတိုင်း အဲဒီ ပန်းချီကားထဲက လမ်းကလေးကိုတော့ အကြိမ်ကြိမ် ငေးမော ကြည့်နေမိတတ်ပါတယ်။          ။

                                                                        လင်းဝေအိမ်

* The Road Not Taken by Robert Frost

“ခေါ်သံ”

“ခေါ်သံ”       

                                

ခေါ်သံတစ်ခုရဲ့ သယ်ဆောင်ရာနောက်ကို ကျွန်တော် မျောလွင့် လိုက်ပါခဲ့တယ်။

ခေါ်သံဟာ အဝေးပြေး လမ်းမကြီးတလျောက် အရှိန်အဟုန်နဲ့ ပြေးသွားတယ်။ ခေါ်သံဟာ သားကောင်ရဲ့ အနံကိုရလိုက်တဲ့ အမဲလိုက်ခွေးတစ်ကောင် သားကောင်ရှိရာအရပ်ကို အရှိန်နဲ့ပြေးသွားသလို ပြေးသွား တယ်။ ခေါ်သံဟာ ဘယ်ကို သွားရမယ်ဆိုတာ တိတိကျကျကြီးကို သိထားတဲ့ ပုံစံမျိုးပဲ။ ခေါ်သံဟာ ဘတ်စ်ကားတွေ တစ်စီးပြီး တစ်စီး ပြောင်းပြီး စီးတယ်။ ခေါ်သံဟာ မီးပွိုင့်တွေကိုတော့ စိတ်ရှည်ပုံမရဘူး။

ကျွန်တော်ကတော့ မီးပွိုင့်တွေကို စိတ်ရှည်လက်ရှည် စောင့်ဆိုင်းတတ်လေ့ ရှိတယ်။ ဘယ်တော့ရောက် လာ မယ်မှန်းမသိရတဲ့ သေခြင်းတရား ဆိုတာကြီးကို ထိုင်စောင့်နေရတာထက်စာရင် မီးပွိုင့်တစ်ခုရဲ့ သိပ်မကြာမြင့်လှတဲ့ အချိန်ကန့်သတ်ချက် ကလေးတစ်ခုကို စောင့်ဆိုင်းရတာဟာ ဘာမှမပြောပလောက် ဘူးမဟုတ်လား။ အဲဒီ တိုတောင်းလှတဲ့ မီးပွိုင့်တစ်ခုရဲ့ အချိန်အပိုင်းအခြားလေး အတွင်းမှာပဲ သေခြင်း တရားဟာ ရောက်ချင်ရင် ရောက်လာနိုင်တာပဲ ဆိုတာကိုတော့ မသိချင်ယောင် ဆောင်ထားလိုက်တာပေါ့။

ခေါ်သံဟာ ပလက်ဖောင်းတွေပေါ်မှာ တွန်းထိုး ရုန်းကန်ပြီး ပြေးတယ်။ခေါ်သံဟာ လမ်းဘေး ပလက်ဖောင်း ပေါ်မှာ ခင်းထားတဲ့ ဈေးဗန်းထဲက ဖရဲသီးစိတ်တွေပေါ်မှာ ၀ဲပျံနေတဲ့ ယင်ကောင်တွေလို မောင်းထုတ်ခြင်း ခံရတယ်။ ခေါ်သံဟာ ယင်ကောင်တွေလိုပဲ တ၀ီဝီ ပျံသန်းလိုက် ခဏ ပြန်နားလိုက်နဲ့ မောင်းထုတ်ခြင်းကို အကြိမ်ကြိမ် တိုးဝင်နေပြန်တယ်။

ခေါ်သံဟာ လမ်းကြားတစ်ခုထဲကို ခပ်သုတ်သုတ် ပြေးဝင်သွားတယ်။အဲဒီလမ်းကြားလေးဟာ  တစ်ဖက်ပိတ် လမ်းကြားလေး။ လမ်းကြားလေးရဲ့ အဆုံးမှာ ဘုံဆိုင်အိုလေး ရှိတယ်။ ခေါ်သံဟာ ပုလင်းထဲ က ခုန်ထွက် တယ်။ ခေါ်သံဟာ ညစ်ထေးထေး ဖန်ခွက်ထဲမှာ ဖြူစင်စွာ ခိုနားဖို့ကြိုးစားတယ်။ ခေါ်သံဟာ ယဉ်ကျေး လှစွာသော လူကြီးမင်းများ သူတို့ဘာသာ ရေးဆွဲ အတည်ပြုထားတဲ့ ရွှေရောင် (ဟုဆိုသည့်) သတ်မှတ် ချက် စံနှုန်းတွေကို ရေနဲ့ ကျင်းပြီး သွန်ပစ်လိုက်သေးတယ်။

ခေါ်သံဟာ လူသူကင်းမဲ့နေတဲ့ ကွန်ကရစ်လမ်းမကြီးပေါ်ကို တက်သွားပြန်တယ်။ ခေါ်သံဟာ ခပ်လှမ်းလှမ်း အရောက်မှာ လမ်းရဲ့ ညာဘက်ကို ချိုးကွေ့ဆင်းလိုက်တယ်။ ကျွန်တော် ထိတ်ခနဲ ဖြစ်သွားတယ်။ ခေါ်သံ ချိုးကွေ့လိုက်တဲ့ လမ်းရဲ့ တစ်ဖက်အခြမ်းမှာ ရှိနေမယ့် သူတွေဟာ အခုပဲ ဘုံဆိုင်အိုလေးထဲက ထွက် လာတဲ့ ခေါ်သံကို ခွေးလေခွေးလွင့် တစ်ကောင်လို မောင်းထုတ်ပစ် လိုက်တော့မယ် ဆိုတာ ကျွန်တော်က သိနေတယ်။ ကျွန်တော် ခေါ်သံရဲ့ နောက်ကို အမှီလိုက်ဖို့ ကြိုးစားလိုက်ပါတယ်။ ဒါပေမယ့် ခေါ်သံဟာ ဘာမှ မဖြစ်ခဲ့သလို မျက်နှာနဲ့ ပြန်ထွက် (ပြန်တက်) လာတာကို တွေ့လိုက်ရတယ်။ “ဘာမှ မဖြစ်ခဲ့သလို မျက်နှာ” ဟာ “ဘာမှ မဖြစ်ခဲ့တဲ့ မျက်နှာ” မဟုတ်ဘူး ဆိုတာကိုလည်း ကျွန်တော်က သိနေတယ်။

အခုအချိန်အထိ ခေါ်သံဟာ ကျွန်တော့်ကို လှည့်တောင်မကြည့်သေးဘူး။ ခေါ်သံဟာ သူနဲ့ ကျွန်တော့် ကြားမှာ ဘာပတ်သတ်မှုမှ မရှိသလို ကျွန်တော့ကို ဥပေက္ခာပြုထားတယ်။ ခေါ်သံဟာ ကျွန်တော့်ရဲ့ ခေါ်သံရော ဟုတ်ရဲ့လား ဆိုတဲ့ အတွေးစက ကျွန်တော့် အာရုံကို တဖြည်းဖြည်းချင်း စူးဝင်လာနေတယ်။

ခေါ်သံဟာ တရိပ်ရိပ်နဲ့ ပြေးနေဆဲပဲ။ ခေါ်သံဟာ ရုတ်တရက် မီးနီမိသွားတဲ့ မီးပွိုင့်ကို စိတ်မရှည်တဲ့ ပုံစံမျိုးနဲ့ ဖြတ်ကူးသွားပြန်တယ်။ တရွေ့ရွေ့ ဝေးသွားတဲ့ ခေါ်သံကို လှမ်းပြီး ငေးကြည့် နေရင်း မီးပွိုင့်ရဲ့  အချက်ပြမီး စိမ်းလာမယ့် အချိန်ကိုပဲ ကျွန်တော် စိတ်ရှည်လက်ရှည် စောင့်ဆိုင်း နေပါတယ်။        ။

                                       လင်းဝေအိမ်