"မြို့လား"
မြို့ထဲကိုဝင်တာနဲ့ ဆိုင်ရာပိုင်ရာတွေကို ပူဇော်ပသပါ၊ မြို့က နက်တယ်
မြို့က မာယာများတယ်၊ မြို့ကောင်တွေရဲ့ အန္ထရယ်ကိုသတိထား
မြို့ဟာ ကူရာကယ်ရာမဲ့အောင် မှောင်တယ်၊ မြို့မှာ ကိုယ့်လမ်းကိုယ် ခုတ်ထွင်ရှင်းလင်း
မြို့ရဲ့ နေရာတိုင်းမှာ ငွေကြေးဟာ ချောင်းမြောင်းနေတယ်၊ မြို့မှာ လေညာ လေအောက် သတိပြု
မြို့မှာ ခြေရာတွေမထင်ကျန်စေနဲ့၊မြို့မှာ အပေါ့/အလေးစွန့်တာကအစ သတိရှိ
မြို့မှာ ဥပဒေသတွေကို မေ့လိုက်၊ မြို့မှာ အစာလုကြ၊ မြို့မှာ မိတ်လိုက်ကြ
မြို့မှာ လျင်သူစားစတမ်း၊ မြို့မှာ ဦးတဲ့သူ မုဆိုး၊ မြို့မှာ အုပ်စုဖွဲ့အနိုင်ကျင့်
မြို့မှာ မျိုးတူချင်းသတ်ဖြတ်၊ မြို့မှာ ရုပ်ဝတ္ထုချင်း တိုက်ခိုက်
မြို့ဘုရင်ဟာ အမြီးကောက်ကောက်နဲ့၊ မြို့ရဲ့ဗီဇစိတ်က ဘယ်ကျည်တောက်စွပ်စွပ်မဖြောင့်ဘူး
မြို့နက်ထဲရောက်တာနဲ့ သတိကို အသင့်ဆွဲထုတ်ထား၊ မြို့မှာ လက်ဦးမှုဟာ ရှင်သန်ခြင်းပဲ
မြို့မှာ တစ်ယောက်နာမည်တစ်ယောက်မခေါ်နဲ့၊ မြို့မှာ အသံတိတ်ဆက်သွယ်
မြို့မီးလောင် မြို့ကြောင်လက်ခမောင်းခတ်၊ မြို့မှာ အမှောင်တရားဟာ အမှန်တရား
မြို့မှာ တိတ်ဆိတ်ခြင်းတွေ ဆူညံ၊ မြို့မှာ ဦးတည်ရာအရပ် မရှိ
မြို့မှာ မမြင်နိုင်လောက်အောင် ဘာမှန်းမသိတဲ့အရာတွေနဲ့ အုပ်ဆိုင်း
မြို့မှာ ဘာမှန်းမသိလောက်အောင် မမြင်နိုင်တဲ့အရာတွေနဲ့ အုပ်ဆိုင်း
မြို့မှာ ...၊ မြို့မှာ ...၊ မြို့မှာ ...၊ မြို့မှာ...၊ မြို့မှာ...၊ မြို့မှာ...
မြို့မှာ ကိုယ့်ကိုယ်ကိုတောင် မယုံနဲ့။
လင်းဝေအိမ်(၀၅-၀၅-၂၀၁၃)
No comments:
Post a Comment